Ky ribotim i trilogjisë dramatike të Stërmillit nis me dramën historike me katër akte "Dibranja e mjerueme", subjekti i së cilës janë ngjarjet e zhvilluara në Dibër, Manastir, Mat dhe në fshatrat e këtyre qyteteve në vitet 1912 dhe 1913. Nga shënimet e autorit në botimin e parë mësohet se, kur po shkruante "Dibranja e mjerueme", Stërmilli kishte në dorëshkrim edhe dy dramat e tjera: "Dashuni e besnikëri" dhe "Agimi i lumnueshëm" ose të paktën kish nisur punën për to. Kjo trilogji, sipas Stërmillit, hedh dritë "në ngjarjet e vërteta qi kanë ngja në kohën e fundit...". Autori u sugjeron lexuesve "që dëshirojnë të kenë një kuptim të plotë mbi lëvizjet kombëtare të Dibrës, duhet të këndojnë edhe dramën 'Dashuni e besnikëri' dhe 'Agimi i lumnueshëm'", që në atë kohë ende nuk ishin botuar.
